धुळवड

गावात पोर पाण्याला गेली वाटेत गुंडा टाकून आली

धुळवडीचा दिवस होता रंगांन पोर माखून गेली

येताच घरी चिडला बाप मायने तिला मारले खूप
बंदव काढी कुर्हाड काठ्या गावात देती टग्यांना चोप
लाख मोलाची आबरू म्हणे मातीला पार मिळून गेली
धुळवडीचा दिवस होता रंगांन पोर माखून गेली

डोईचा गुंडा धरून पोर गुमान कशी चालली होती
लांबून आली रंगेल टोळी रंगाची फेक करत होती
मारली कुणी पिचकारी ती जन्माला डाग पडून गेली
धुळवडीचा दिवस होता रंगांन पोर माखून गेली

साखरपुडा झालेला तिचा दावण तिची ठरली होती
नवती पोर वायाला गेली खबर अशी सासरी होती
वाहून गेलं शेणाचं घर मेणाची माती वितळू गेली
धुळवडीचा दिवस होता रंगानं पोर माखून गेली

दूषणी रंग झालेत गोळा साऱ्यांनी केला काळोख काळा
कुवारमांड राहिली पोर जगणे झाले चोळा कि मोळा
लागण्याआधी हळद अंगा हाउस तिची फिटून गेली
धुळवडीचा दिवस होता रंगानं पोर माखून गेली

भेटते आता गावात एक म्हातारी तिची कहाणी सांगे
रंगानं केली बेरंग पोर आयकून जीव आढ्याला टांगे
रंग्पंचीम खेळत कोणी दगड त्याला मारून गेली
धुळवडीचा दिवस होता रंगानं पोर माखून गेली

-संतोष पवार (पिढीप्येस्तर प्यादेमात)